jeudi 29 novembre 2012

يا حلمة ما تمّت

-سيادة الوزير سليانة راهي شعلت... الاّكريموجان راهو قريب يوفا ... و الجماعة ماهمش باش يتراجعوا ... الشعب فدّ ... الشعب متغشّش ...

-اضربوهم قطّعوهم ما ترحموهمش الوالي من غادي مش باش يتحرّك ياخي البلاد على قرنهم ؟ و الاليات الجديدة اللي جاتنا من قطر زينة؟ ماهو جبناهم باش نستعملوهم ...الرشّ شنعملو بيه. نلوّحوه تي راهي فلوس زرقة هاذيكة لازم نستعملوها...

-سيادة الوزير الحلّ الامني مش حلّ ... سيادة الوزير وكان الوالي يمشي يبدّل الساعة بساعة حتى تهفت الامور و بعد ربي يعمل دليل.

_ ما عادش تعاودو هالكلام الوالي من غادي مش باش يتحلحز و كان عجبهم تي اضربوا الكوازي تو يجفلو و يشدّو ديارهم تي كان لزم اقتلو واحد ولاّ زوز كيما يقولو اضرب القطوسة تتربّى العروسة ...باهيشي توّة شكون يحكم في البلاد احنا ولاّ هوما ؟

-سيادة الوزير الحلّ الامني و الله لاهو حلّ و سيادتكم شفتوا شنوّة صار مع النظام البائد الشعب راهو فدّ... و هاك ترى الناس في السبيطارات و اللي عينو مفقوسة و اللي جلدتو منقوبة ...

-طبّق التعليمات ...

- سيادة الوزير ... انا نعلن استقالتي و نرفض باش نعطي التعليمات هاذي لأعواني ... الشعب حرّر البوليس , الشعب عطانا الفرصة باش نتحرّروا احنا زادة ... انا ما نجّمش نقتل اولاد شعبي ... سيادة الوزير اعطي نت التعليمات انا ننسحب... انا ما نجّمش نعتدي على اولاد بلادي بالطريقة الوحشية هاذي ...


 تيت تيت تيت الفياقة تنوقز : تقوم تلعن الشيطان و تتفكّر اللي البير بير و الماجل ماجل و اللي البوليس عمرو ما يوّلي راجل
تضحك على روحك كيفاش   حبّيت في نهار تصدّق الكلام هذا :

,



 و تتفكّر التصاور هاذم و غيرهم و غيرهم :




 ... تفيق و تتفكّر اللي احلامك و احلام الملايين تسرقت... تفيق و انت مدمّر مالاخبار اللي جاية من سليانة و غيرها مالبلايص اللي مالقمع و الميزيرية ما خرجتش ... تفيق و انت تتذكّر في الناس اللي البارح تعلّق بسخرية على المظاهرة اللي شاركت فيها و هوما ناسين اللي غدوة الدور ينجّم يجي عليهم ... اللي غدوة خبزتهم تنجّم تتمسّ , تفيق و انت تضحك على روحك كيفاش تحسب في المتظاهرين اللي شطرهم بوليسية يامّنوا من قدّام و من تالي و تصبّر في روحك و تقول في ديسمبر 2010 في العاصمة العدد ما كانش اكبر من هكّة و بعد كبر... تفيق و انت ماعادش عارف شنوة تعمل ... تشدّ الدار؟ تتظاهر تمشي لسليانة ... و بالطبيعة كان تمشي لسليانة تولّي راكب على الثورة و كلن تقعد تولّي ما علبلكش و ما تحبّش تعاون الناس... تفيق مجوجم داخل بعضك مش فاهم كوعك من بوعك ... و الاخبار جاية تزيد تشعّلك نارك ... تزيد تمهمشك ...
تقول اضعف الايمان نمشي نعطي شوية دم في السبيطار تتفكّر اللي دمك ما ينفعش و اللي صحّتك ساقاط و اللي انت عاجز تزيد تتحمص
تزيد تعدّى قدّامك تصويرة طرّوش و هو يقيّد في عدد اليات القمع اللي جاتهم من قطر و هو فرحان ... تحسّ بنقمة تجيك افكار ماهياش افكار و كان نفجّر روحي قدّام الداخلية ؟ و كان نرّحلها الكلّ ... تلعن الشيطان و تقول انا متاع السلم و السلام ... عيب هالكلام.. بالسيف يوّلدوا فيك افكار متطرّفة بالسيف يدزّوك االقصى .. تولّي ناقم تتساوى قدّامك الاشياء بعد اللي انت عايش و مش عايش
.... ...


2 commentaires:

مجرد رأي

نحن شعب لا يتعظّ من ماضيه و لا يحفظ دروس التاريخ و كأنّني بنا شعب قصير الذاكرة أو دعوني أقول معدوم الذاكرة. تستهوينا بعض عروض التهريج في مج...